الغابة - نجية عماري
--------------------
طلعت لڭدية لي في جنب الغابة بان لي فرڭ ديال لحجل طايرة تفدفد في السما فرحانة نزلت عيني في ڭدام لڭدية لقيت رنب تحنقز خايفة من الصياد او صوت كلبو لفزيعة سرحت عيني نتأمل في الغابة لقيتها جنان من الاحلام الزوينة هزاتني اللهفة جبرت راسي نجري من البهجة وسط الوان باهية كاين صفراء حمراء خضراء من هاديك الوردة غادة او نسلم على حبال الشجرة تنزل فوق كتافي ترحب بالضيف من الفرحة شحال انتي كريمة ياالغابة الحنينة فيك حجرة في قلبها مرجانة فيك شجرة على غصانها ثمرة فيك نحلة وشهدة فيك عشب او عشبة داوي وعكة فيك فحم يرجع جمرة فيك اوفيك او شلا ما قريت فيك يا الغابة
--------------------------------------
نجية عماري