يا عمي الكبير - أحمد الناصري
-------------------------
كيف داير ياعمي لكبير ياك لباس وصباح الخير وهذا راه نهار كبير ملي حنا فيه شفناك.... - عرفتك جيتي عندي تحسن والشعر ليك راه محن هاز ليك وسخ وعفن وبالصهد راه عطاك.... - مرحبا وزيد هنا تريح وفي نوبتك ما تسمح انا غير نسطر ونفح وانا دابا راني معاك.... - الكرسي راه غير من لخشب وعنداك المسمار ليك يعطب وتبقى فيا غير تشتم وتسب ومعايا تقطع لغاك... - قلت يا ربي يا باسم الله وجلست وتقابلت معاه والدابة مربوطة حداه وحالها مع القيطون محاك.... - بجنبي البردعة والشواري والمرايا بالريح تتراري وانا براسي تنداري وعاد الحلاق فتح الصاك... - بدا يعاود ليا في الحكايات ورد حالتي كلها رغوات وركب للموس دوك الشفرات وقلت ياربي انا ف حماك.... - رغا الوجه وبدا فيه يكرط ومن الزغب رجع ملط وليا يعاود وعليا يزفط ويقول ما عمرني انا ننساك... - ورجع المقص و هو ليه يهز وكمل على الراس فيه يدز سالا قال لي نوض تهز نشوف شكون وراك.... ------------------------------ اعطيتو ما تيسر وقلت له بسلامة هاذ المرة راهامعاك تحلى الهدرة ولقصارة ملي يكبر شعري نجي نلقاك.... ------------------------------ ...........أحمد الناصري......29..10..2017