جدر الاصل - ادريس جبيلو
--------------------------
كلها ويلغي بلغاه شي ضرب وشي غنى شي شطح وشي تمنى شي رحيله فات مع كناش الوفيات كمشة ف قبر مشات شي ضربو الغدر واهيهات ياٱمة الموضة والاشهارات كلها وحمله ف قفاه واش صرخه مني تحميني مني ومنك وم اللفعات مولات الخشبه والنصبه ف البيوت حاكمات ف هاداك وهادا ف مول المنضده ومول المحفضه ياشباب هواه واش ف زمان الغلا(ء) عصر العمارات والكاط كاطات باقي تركب بغله وانت مازال بالحفى بيتك قبر ومنفى شي عجبه راسه شي طلع له الدم شي شعل باسه وشي عمره اتم مافكروا ف الإله مول الحكمة الربانيه والمدرسه القرآنيه نساو جدر الاصل حالهم ف الويل واصل باقية فينا الخنونه نمسحوها بكم الهم يتصبن ف حجرة الساگيه الباكيه بشرشور سوالف وشعور تمسح عطش اللهفان رحمه ف الفم بارده آه ياٱمة آه ياٱمة آه فين اوزاني فين اوطاني فين عنواني فين ديواني اللي نضمته بلساني ياللي حروفي غنت ف سماه مالهم شي غاب نص عام وشي تعلق ف عود وصام ؤوقت الحساب شموا ريحة الوزيعه سلاگ الغابه دوك الحطابه فرقوها حيره بناب ونسجوها نغمه ف كتاب صادقوا عليها بلا جداه حويطه حويطه وتحدت الخريطه آش هاد التشرويطه فين داك التزعريطه واحنا هما دم اسنانه مايغمض مايبرد لسانه يلا مادى من حطبنا عود فلگه وگداه
------------------------
بقلم ادريس جبيلو المغرب