الولد ل ميمتو - ادريس جبيلو

---------------------------

فداك الكانون المناصب تلاته كحلوا العيون بحطب الحراته الحب مجنون والرومانسية ب اوقاتا الما(ء) م العيون والنشوة عند الهياته ف مملكة الفنون امي كانت الزغراته

الفران ف الدار والحطب ف الغابه البخور ف المجمار والبركة ف الصابه ماكان غدر ماكانوا نصابه بگرة وحمار والسكة گلابه من بعد المطر ف التربة لعابه

المحرات وبهيمتو عشرة وإراته المنجل ب قيمتو والفاس إغاته الولد ل ميمتو والبنت للحراته كلها وقبيلتو ب طبايع توراتا تطبع طبيعتو بحروف الورته

القوت من الشجره وحبوب الحصايد الغنم فخره وصوفها للقايد ف البيت نضره لباس ومخايد الزيت م المعصره والحليب الزايد يروب ف الگدره لبن وزبايد

حتى حال مابقى على حالو تلف الموال والحرام لقى افعالو كلشي جال يقلب على مقالو الطارة والگوال يغنيو ب قوالو العايش بلا مال الموت اولالو

-----------------------

بقلم ادريس جبيلو المغرب