اللذة تحتج - ادريس جبيلو
------------------------
كيف نفرح بالشدگ وگلبي بالضلم عرگ الخبز مضغتو مااتبلع لي الما شربتو مااتسرط لي مشات اللدة تحتج والما حرار حدج الدم ساح الموت فاح المبني طاح والباني راح
كيف يدوز ليا الشدگ والمهراز فيا يدگ كامون عطات ريحتي مابكات غير اميمتي ف محافل العزاية تقلب ف المراية على صورتها ف سمايا وردة هابلة ولا ساقطة دابلة لوانها مخبلة لواها الريح ولا الفعل القبيح باللحية والتسابيح
كيف يهبط ليا الشدگ وفوق راسي مدگ يشلخ اطرافي يخربط القوافي والنار عوافي تحرق الحدود ف تابوت العود وقبر منبود بصاروخ الحرية هدية ليك وليا من سما الابجدية والخاوة الوطنية
-----------------------
بقلم ادريس جبيلو المغرب