يمكن ... - ادريس جبيلو
-----------------------
سولت عقلي الغالي على ايام اخوالي وكيف تغير دلالي ماتليت نعرف مالي قاللي ماصاغ حكمة مانضم مالحن كلمة ماتعلم ف سوق اللمة يخطف القلوب بالبسمة الضحكة ولات صفرة الطوال اصبح شعرة العيشة يمكن مرة عكلت ميزان الهدرة يمكن كنت انا الخايب مجمع البلا والمصايب معلم المرا الحرايب بالتلحليح بو الغرايب
سولت عقلي الغالي على لحن موالي واش ضاوي هلالي ولا انا ف الضلام نلالي گاللي ماحكم ودانو والبوح مافصلو لسانو تغزغز مابين اسنانو ماطاح ولقى غيوانو يمكن الزفزافي والنفنافي دارو بوهزهاز ف القوافي لطموا المردوم بالحافي وتاه الحرف ف الفيافي يمكن كنت انا ياانا اللي ماعندي گانا مخسر فرقة الحسانة ف بوق فنان المگانة
سولت عقلي الغالي على مايدور ف الدوالي نعرف واش جايب حالي ولا انا قبان مسالي گاللي ماقرا الصورة العين ماحكمت الصبورة المسافة ماكانت معبورة والخطوط ماكانت مبشورة المراية كانت مضبة واللوان مامناسبة يمكن كنت انا العگبة ف باب ديك العتبة يمكن كنت انا المخطوف ليا الضو من الرفوف وتلس حالي بالهتوف وماتليت نقشع حروف
-------------------------
بفلم ادريس جبيلو المغرب