بنت امي حلومة - حسن الزايري
------------------------------
بنت امي حلومة لميمة عليها رضات والبيبان لها تحلات ملي كانت من المقصيات ؤحالها ماشي فحال لعيالات الدنيا ليوم لها ضحكات وقيلا ربي يسر لها دير وليدات تلاقات مع عكوزمن لعكايزات سولتها على شي بنيتات للزواج يكون صغارات بنات ديور كبار مربيات بنت أمي حلومة تزنكات والدمعة لها سالت فكرتها فلي نسات مسكينة تصدمات ؤكالت يتزوجو الصغيرات وانا نبقى مع البيرات شحال وشحال تنغصات لعكوز لها تفكدات كالت لها أش بيك أ زينتة لبنات أزينة السميات لالة لعيالات حكات لها لمضى ؤ فات لعكوز تبهرات كالت الله الله ولدي ولدي بغاه الله رجل ولد باه سيد الرجال ربي معاه بنت امي حلومة لموتياه يكون سيدها ؤ تكون لاله حاضية غيبتو ؤحافظاه تخلطو دموع لفرحة والنغصة فعينين لكانت ميتة بالفقصة ؤحياتها مكفسة مضيومة مكرفصة لكانو عليها يحلو فامهوم يفطرو بها وهي كدامهوم هامليناه كيف خدامهوم جات لعكوز لدارهوم وعاودت زغرتت فحومتهوم الجيران صدمتهوم بنت أمي حليمة فرحات ؤبلعكوز رحبات حادكة ديما موجدة لكيكات لعكوز عاودت زغرتات تجمعوا لخوت ولخوتات جات أمي حلومة زينة السميات عينيها مغرغرات كالت الله الله الله سعدي بَنتي على راسها دبرات تفكو لها لحجابات وأمورها وقيلا تيسرات سلمت عَل لعكوز وتافقو على نهار بزوج كالت لها جيبي ولدك ولعكوز ؤمرحبا بهم بزوج نديروا لامة نفرحوا فلحومة لكانت فيها بنت مضيومة كلشي عليها يتكلم ينكر عليها مايحشم حالين فامهوم نساو بناتهوم وتحلت العكدة بنت أمي حلومة ضربتها لفكدة كتبت كتابها ومشات لدارها فرحو هلها واحبابها من بعد ماطار عذابها ومشات دير ولادها لحومة لها فرحات من بعد مكانت حثيث لعيالات ولات لالة لعيالات أمها عليها رضات وقصتها هنا وقفات
بنت أمي حلومة
------------------------- بقلم حسن الزايري /