ياناس ماني زجالة - رانيا أقلعي
-------------------
ياناس ماني زجالة حروفي ما هي فتانة قوافي ما تعرف الموزون و لا تصلح تكون ملحون نحكي يانا المطمور داخل واقع محظور نتكلم و نبغي كلامي يكون مقبول ما نفرضو و ما نحبو محلول من عياط ليام ننظمو باش يوللي محسوس يتشاف ويكون ملموس ما هو طامع فمنصب مضمون ولا تصفيق مغبون الزين رزانة المعقول و المال ما يغوي غير المهبول اللي يتلاح فوحلو مذموم و يعيش ايامو موهوم ما هو راضي بالمقسوم ما شاف للي عايش مشؤوم يدق البيبان مهموم طرف الخبز سائل و حالو مغموم عيا يبرح المجدوب الزمان غدار مغضوب فيه الصاحب يولي مقلوب يوم يضحكلو الزمان يبدل الأسلوب وييه هو هداك للي لعبتي معه ف الدروب و تقاسمتو الدرهم و تواعدتو على صفا لقلوب عاو تاني قال المجدوب رود بالك من مولات الخلخال على العرقوب تغويك بنظرة وتقولك نتا لمحبوب تلوي الدرب تغمز للمحجوب هو العزيز و هو المرغوب جيبو عامر هذا هو المطلوب نتا غير بيطالي بصطامك معطوب على أمرك مغلوب عيا يهضر و يبرح المجدوب ونتا ربعتي يدك و بقيت مكروب تقول هذا مكتوب لا واه يا لمنكوب فيق و شوف قدامك ما تبقا مقلوب الحياة زينة ما توقف عند صاحب غرو الركوب و لا حمامة على قلبك حطت ومللي رشقلها لهروب جات و قالت هذا مكتوب وا فيق وسماع للمجدوب الحياة راها واقع ما تكون بالتلاوي و الكدوب